Maider Unda

Asturiaseko Federazioaren Zilarrezko Bereizgarria

Mon, 20 May 2013 00:00:00 +0200

Joan den asteburuan, Asturiaseko Borroka Federazioak zilarrezko bereizgarria eskeini dio Maiderri horrenbeste urteetan zehar borroka kirolarenganako izan duen konpromezu eta eskeintza haintzat hartuz.

Ekitaldia Xixonen ospatu den "Real Grupo de Cultura Covadonga" taldeak antolatutako XVII. Borroka Txapelketaren inguruan ospatu zen. Taldearen 75. urteurrena dela ospatzeko ekitaldien artea burutu da txapelketa hau.

Aurretik, ostiral arratsaldez eta larunbat goizez, Maiderrek gidatutako entrenamendu saioak izan ziren txapelketan parte hartuko zuten Galizia, Burgos, Nafarroa, Madril, Euskadi eta Xixon bertako kirolarientzat.
Bereizgarria Asturiaseko Kirol Zuzendaria den Jose Ramon Tueroren eskutik jaso zuen larunbat gauean izan zen lagunarteko afarian.

Bartzelonan La Minako kirolgunean

Sun, 12 May 2013 00:00:00 +0200

Bartzelonan Sant Adria de Besos herriko "La Mina" borroka taldearen entrenamentu gelak Maider Unda izena izango du aurrerantzean.

Kataluniako Borroka Federaioak "La Mina" taldearen kirolgunera aldatu du bere egoitza eta honekin batera entrenamendu gela berriaren irekitzea ospatu zuten. Gela berri honek Maiderren izena izango du, espainian olinpiar domina lortu duen lehen borrokalariaren omenez. Bide batez, ekitaldirako Bartzelonara egindako bidaia tarteko, Maiderrek bertan den goi mailako kirol egoitza bisitatu zuen.

Bestalde aste honetan, ETBko Bisitaria saioan Maiderri egindako erreportaia ikusi ahal izan dugu.

Lehendakariaren Harrera

Wed, 17 Apr 2013 00:00:00 +0200

Iñigo Urkullu lehendakaria Maider Unda (borroka librea) eta Jon Santacana (eski alpinoa) euskal kirolariekin bildu zen astearte arratsaldean Ajuria Enean, Europako txapelketan eta egokitutako eskiko munduko txapelketan, hurrenez hurren, lortutako garaipenen ondoren.

Harreran Cristina Uriarte Hezkuntza, Hizkuntza Politika eta Kultura sailburua eta Jon Redondo Kirol zuzendaria ere izan ziren. Urkulluk kirolariok irudikatzen dituzten balioak nabarmendu zituen: «Ahalegina, hobetzea, sakrifizioa, konfiantza eta gugan eta gure ingurukoengan fedea izatea». Ziurtatu zuenez, horiexek dira lehendakari gisa eskatzen dituen balioak; «izan ere, bizitza bera ezbeharren kontrako eski-lasterketa bat edo borroka libre bat da, batik bat orain bizi dugun garaian».

Lehendakariak nabarmendu zuenez, kirolean bezalaxe, merezi du «egunero-egunero ahalegintzen jarraitzea, krisia garaitzeko eta tuneletik adoretuta irteteko».

Zilarrezko domina Europako Txapelketan

Fri, 22 Mar 2013 00:00:00 +0100

Zilarrezko dominarekin itzuliko da Maider etxera Georgian ospatzen ari den Europako Borroka Txapelketatik. 2010ean Bakun eta 2012an Belgraden lortutako brontzezko dominak hobetu ditu honenbestez gaurko finalean.
Egungo Olinpiar txapelduna den Natalya Vorobeva Errusiarrak ez dio batere aukerarik utzi eta 0-4, 0-2 galdu du finala.

Aurretik, zozketak final zortzirenetatik at utzi zuen Maider eta zuzenean final laurdenetan hasi du txapelketa. Bertan, Epp Mae Estoniarra 0-1, 0-2 kanporatu du. Ondoren, final erdietako lehian, Londreseko Olinpiar Jokoetan brontzezko dominaren borrokan aurkari izan zuen Vasilisa Marzaliuk Bieloerrusiarrarekin topo egin du berriro. Oraingoan ere Maider garaile atera da 1-0, 1-0.

2013ko Europako Txapelketa Tbilisin

Thu, 21 Mar 2013 00:00:00 +0100

Bihar ostirala, martxoaren 22an, Maiderrek denboraldiko lehen hitzordu nagusiari aurre egingo dio. Georgiako Tbilisi hirian ospatzen ari den Europako 2013ko Borroka Txapelketan parte hartuko bait du.
Bidaia luze eta ezegoki baten ondoren, zozketak Epp Mae Estoniarrarekin parekatu du final laurdenetako kanporaketan. Guretzat goizeko hamarrak direnean ekingo diote lehiari.
Txapelketako emaitzak ondorengo irudian klikatuz jarrai ditzakegu:

Bestalde, hona BAT Basque Team erakundeari eginiko adierazpenak txapelketari begira:

Tolarea Kofradiaren Ohorezko kide

Mon, 18 Mar 2013 00:00:00 +0100

Gipuzkoako sagardo naturalaren Tolarea kofradiak bere urteroko jaia ospatu zuen pasa den igandean, martxoak 17.
Hernanin burutu zen 18. kapituloaren baitan, Maider kofradiaren Ohorezko Kide izendatu zuten eta berak, sagardoa edonon defendatu eta honen alde egingo duela zin egin zuen. Berarekin batera, Joxe Mari Aizega, Basque Culinary Centereko zuzendaria eta Larre Gain sagardotegiko Pedro Santa Kruz sagardogilea ere Ohorezko Kofrade berri dira.
Domina eta diploma jaso ondoren, kupelaren bueltan, sagardoaren alde egin zuten zin hirurek.

Espainiako Kirol Prentsa Elkartearen Saria

Wed, 06 Mar 2013 00:00:00 +0100

Espainiako Kirol Prentsa Elkarteak Murtziako Romea Antzokian ospatu duen XXXIII. Kirol Jaialdian, Maiderri 2012 urteko kirolari onenei eskeinitako saria eman diote. Pasa den urteko Olinpiar Jokoetan dominak lortu zituzten kirolariek protagonismo berezia izan zuten jaialdian, besteak beste, Espainiako futbol selekzioak, Madrilgo Atletikok, Alejandro Valverdek, Jorge Lorenzok, Marc Marquezek eta Espainiako patinetako hockey taldeak ere jaso zituzten sariak.

Maiderrek sari banaketara joaterik izan ez zuen arren, bertaratutakoak agurtu eta saria eskertzeko modua izan zuen bideo baten bidez. Bere izenean, Espainiako Borroka Federazioko Zuzendari Teknikaria den Javier Iglesiasek jaso zuen saria.

Honako bideoan ikus dezakegu sari banaketaren momentua:

Bestalde, BAT Basque Team-i eskeinitako adierazpenetan, denboraldi berri honen hasieran izan dituen sentipenak eta Nazioarteko Olinpiar Batzordeak borroka Olinpiadetatik kanpo uzteko aukeraz aritu da.

Urrezko domina berri bat Espainiako Borroka Txapelketan

Sun, 24 Feb 2013 00:00:00 +0100

Otsailaren 23n, Murtziako San Javier herriko polikiroldegian ospatu den Espainiako Borroka Txapelketan, Maiderrek urrezko domina berri bat irabazi du. Aurtengo lehian, Noelia Lalin (Galiziarra), Haridian Gonzalez (Kanariarra) eta Maria Jose Noguera (Andaluziarra) izan ditu arerio eta aurkako batere punturik jaso gabe bukatu du txapelketa Maiderrek. Azken honekin, hamalaugarren aldiz lortu du Espainiako Txapelketan urrezko domina.

Txapelketa bukaeran, Luis Crespo, Maiderren entrenatzaileak; Francisco Barcia, emakumezkoen hautatzaileak eta Maiderrek, Espainiako Federazioak eskeinitako oroigarri batzu jaso zituzten Londreseko Olinpiar Jokoetan irabazitako dominagaitik. Era berean, Borroka Olinpikoa 2020ko Jokoetatik baztertua izan ez dadin eskatzen duen adierazpena irakurri zuten.

Hemendik aurrera, martxoaren 19tik 24ra bitartean Tbilisin (Georgia) ospatuko den Europako Txapelketaren prestaketarekin jarraituko du.

Brontzezko Domina Klippan Lady Openean

Sun, 17 Feb 2013 00:00:00 +0100

Brontzezko dominarekin itzuliko da Maider etxera Suedian ospatu den Klippan Lady Open txapelketan Anastasia Lobsinger Estatu Batuarrari irabazi ondoren. Lehen zatia bukatzear zela, Maiderrek bere arerioaren sorbaldak lurrean finkatzea lortu du eta modu hontan bukatu du denbolardiko lehen nazioarteko txapelketa baten bere parte hartzea.

Gaurko lehiaren irudi batzu:

Datorren asteburuan, Murtzian ospatuko den Espainiako Txapelketan parte hartuko du Maiderrek.

Suediako Klippan Lady Openean

Sat, 16 Feb 2013 00:00:00 +0100

Denboraldiko lehen txapelketari ekin dio Maiderrek Suedian ospatzen den Klippan Lady Openean. Lehen borrokaldia Maria Selmaier Alemaniarrarekin izan du eta semifinaletarako sailkatzeko balio izan dio 1-0 eta 2-0 irabazita.
Semifinaletan, joan den urteko finalean aurkari izan zuen eta egungo Olinpiar Txapelduna den Natalia Vorobeva Errusiarra ezin izan du gainditu (2-1, 1-0).

Bihar igandea, goizeko 10etatik aurrera, bigarren aukerak eta dominetarako borrokaldiak izango dira. Bertan, Maiderrek Anastasia Lobsinger Estatu Batuarra izango du arerio brontzezko dominaren lehian.
Gaur bezala, txapelketa telebistaz jarraitu ahal izango dugu ondorengo lotura jarraituz: Klippan Lady Open.